”Ishte dora e Zotit”, filmi që do të çojë Italinë në Oscar

‘’E’ stato la mano di Dio” (”Ishte dora e Zotit”)  me regji nga Paolo Sorrentino do të përfaqësojë Italinë në përzgjedhjen për filmin më të mirë të huaj në Oscar.

‘’E’ stato la mano di Dio” u përzgjodh ndërmjet 18 regjisorëve italianë që paraqitën projektet e tyre kinematografike.

”E’ stato la mano di Dio’ është filmi im më i rëndësishëm dhe më emocional për mua. Jam i lumtur që e gjithë kjo dhimbje sot ka çuar në gëzim”, tha Paolo Sorrentino pas lajmit për zgjedhjen e filmit të tij për të përfaqësuar Italinë në çmimin Oscar.

Filmi portretizon historinë e një djali në Napolin e trazuar të viteve 1980. 17-vjeçari Fabietto Schisa është një djalë i ngathët që përpiqet të gjejë vendin e tij në botë, por që gjen gëzim në një familje të jashtëzakonshme, që e do jetën. Derisa disa ngjarje fillojnë të ndryshojnë gjithçka. Njëra është ardhja në Napoli e një legjende sportive të ngjashme me një perëndi: idhulli i futbollit Maradona, i cili ngjall tek Fabietto dhe në të gjithë qytetin, një krenari që dikur dukej e pamundur. Tjetri është një aksident dramatik që do ta bëjë Fabietton të prekë fundin. Me sa duket i shpëtuar nga Maradona, i prekur rastësisht ose nga dora e Zotit, Fabietto lufton me natyrën e fatit, konfuzionin e humbjes dhe lirinë dehëse për të jetuar. Në filmin e tij më emocionues dhe personal, Sorrentino shoqëron audiencën në një udhëtim plot kontraste midis tragjedisë dhe komedisë, dashurisë dhe dëshirës, ​​absurdit dhe bukurisë, ndërsa Fabietto gjen të vetmen rrugëdalje nga katastrofa totale; atë përmes imagjinatës së tij.

Njoftimi zyrtar i të gjithë nominimeve do të jetë më 8 shkurt 2022 dhe ceremonia e ndarjes së çmimeve Oscar do të zhvillohet në Los Anxheles më 27 mars.